کیا نوٹ بک ایل ایم کے ویڈیو اوورویوز واقعی 80 سے زائد زبانوں میں دستیاب ہیں؟

گوگل نے اپنے نوٹ بک ایل ایم میں نئی خصوصیات متعارف کرائی ہیں جن میں سب سے نمایاں ہے ویڈیو اوورویوز۔ پہلے یہ ٹول صرف آڈیو کی شکل میں مواد تیار کرتا تھا، یعنی پوڈکاسٹ طرز کا خلاصہ، لیکن اب یہ ویڈیو کی صورت میں بھی مواد تخلیق کرتا ہے۔ یہ تبدیلی خاص طور پر ان لوگوں کے لیے کارآمد ہے جو پڑھائی یا پریزنٹیشنز کے لیے بصری انداز میں سمجھنا چاہتے ہیں۔

ویڈیو میں بتایا گیا کہ اس فیچر کو استعمال کرنے کے لیے سب سے پہلے آپ notebooklm.google.com پر جائیں اور “Create New Book” پر کلک کریں۔ اس کے بعد آپ کو اپنا ماخذ دینا ہوگا۔ جو کہ کوئی ڈاکیومنٹ، ٹیکسٹ، کتاب یا یوٹیوب ویڈیو ہو سکتا ہے۔ اگر آپ کے پاس کچھ خاص نہ ہو تو آپ “Discover Source” کے ذریعے سرچ بھی کر سکتے ہیں۔ جیسے مثال میں CSS کے امتحان پر گائیڈ بنانے کے لیے پرامپٹ دیا گیا۔ 

نوٹ بک ایل ایم خود بخود انٹرنیٹ سے متعلقہ مواد تلاش کرتا ہے اور صارف کے سامنے مختلف ذرائع پیش کرتا ہے۔ صارف اپنی پسند کے ذرائع امپورٹ کرتا ہے اور ماڈل انہیں سمجھ کر خلاصہ فراہم کرتا ہے۔ یہی نہیں بلکہ صارف سوال بھی پوچھ سکتا ہے اور مزید وضاحت لے سکتا ہے۔

سب سے دلچسپ بات یہ ہے کہ یہ سب کچھ صرف انگریزی میں محدود نہیں بلکہ 80 سے زائد زبانوں میں دستیاب ہے جن میں اردو، سندھی اور پشتو بھی شامل ہیں۔ یعنی آپ آؤٹ پٹ لینگویج میں اردو منتخب کریں تو ہر جواب اردو میں ملے گا۔

آڈیو اوورویو تو پہلے سے موجود تھا لیکن اب نیا اضافہ ہے ویڈیو اوورویو۔ اگر آپ سادہ طریقے سے کلک کریں تو ویڈیو خودکار طور پر بن جائے گی۔ لیکن اگر آپ “Customise” کے بٹن پر جائیں تو وہاں آپ اپنے انداز میں ہدایات دے سکتے ہیں۔ مثال کے طور پر ویڈیو کے آغاز میں تعارف کس طرح ہونا چاہیے۔ گائیڈ کے بارے میں کیا بتایا جائے، یا حتیٰ کہ سوشل میڈیا پر فالو کرنے کی ترغیب بھی شامل کی جا سکتی ہے۔

جب ویڈیو تیار ہو جاتی ہے تو اسے نہ صرف ڈاؤن لوڈ کیا جا سکتا ہے بلکہ فل اسکرین میں بھی دیکھا جا سکتا ہے۔ انسٹرکٹر نے CSS گائیڈ کی ویڈیو دکھائی جس میں تفصیل سے بتایا گیا کہ امتحان ہے کیا، کون اہل ہے، کامیابی کے معیار کیا ہیں اور اس کے مختلف گروپس کون سے ہیں۔ اس سب کو ایک مائنڈ میپ میں بھی دکھایا گیا تاکہ سیکھنے والوں کے لیے تصور آسان ہو جائے۔

یہ ٹول صرف انٹرنیٹ سے مواد لے کر ویڈیوز نہیں بناتا بلکہ اگر آپ کے پاس اپنی کوئی کتاب، تنظیم کی پروفائل، یا کوئی ڈاکیومنٹ ہو تو اس پر مبنی بھی ویڈیوز بنائی جا سکتی ہیں۔ مثال کے طور پر اگر آپ نئے ملازمین کو ٹریننگ دینا چاہتے ہیں تو آپ کا موجودہ مواد اپلوڈ کر کے اس کا ویڈیو اوورویو تیار کیا جا سکتا ہے۔

نوٹ بک ایل ایم نے ثابت کر دیا ہے کہ سیکھنے اور مواد کی تیاری اب صرف چند کلکس کی دوری پر ہے۔ چاہے آپ طالب علم ہوں، استاد یا کوئی ادارہ، اب ویڈیو اور آڈیو اوورویوز کے ذریعے علم کی ترسیل پہلے سے کہیں زیادہ آسان اور مؤثر ہو گئی ہے۔