دنیا کا تیز ترین گرافک ڈیزائنر: اے آئی

السلام علیکم دوستو! میرا نام قیصر رونجہ ہے، اور میں اردو اے آئی  کی جانب سے ایک اور دلچسپ موضوع کے ساتھ حاضر ہوں۔ آج میں آپ کو کچھ ایسا دکھانے والا ہوں، جو شاید آپ نے پہلے نہ دیکھا ہو، نہ سنا ہو۔ اور اگر سنا ہو، تو یقیناً آپ نے اس کا اتنا کمال استعمال نہیں دیکھا ہوگا۔ ہم بات کرنے جا رہے ہیں گرافک ڈیزائننگ کی، لیکن کسی انسان کی نہیں بلکہ ایک ایسی اے آئی  کی جو لمحوں میں وہ کام کر دیتی ہے، جو کسی ماہر ڈیزائنر کو گھنٹوں لگتے ہیں۔ تو آئیے، دیکھتے ہیں کہ دنیا کا تیز ترین گرافک ڈیزائنر آخر ہے کون؟ اور یہ اتنا خاص کیوں ہے؟

google 2.0: اے آئی  کا جادو

ہم جس اے آئی  ٹول کی بات کر رہے ہیں، اس کا نام ہے google 2.0۔ یہ ایک ایسا امیج جنریشن ماڈل ہے جو صرف آپ کی بات سن کر، چند لمحوں میں وہ تصویر تیار کر دیتا ہے جو آپ کے ذہن میں ہے۔ اس کا استعمال بھی نہایت آسان ہے  آپ “Image & Text” والا آپشن منتخب کریں، اور صرف ٹائپ کریں کہ آپ کیا چاہتے ہیں۔ نہ کوئی خاص مہارت چاہیے، نہ کوئی لمبی چوڑی سیکھنے کی ضرورت۔ بس چند الفاظ، اور نتیجہ آپ کے سامنے!

واٹرمارک کا خاتمہ: ایک کمانڈ، صاف تصویر

تصور کریں کہ آپ کے پاس ایک خوبصورت تصویر ہے۔ لیکن اس پر واٹر مارک لگا ہوا ہے۔ اب یا تو آپ Photoshop کھولیں اور اسے ہٹانے میں وقت لگائیں، یا پھر google 2.0 کو کہیں: “Remove watermark from this image” اور چند سیکنڈز میں تصویر بالکل صاف، جیسے کچھ تھا ہی نہیں۔ حیرت انگیز بات یہ ہے کہ آپ نے صرف ایک جملہ لکھا، اور اے آئی  نے سب کچھ خود بخود کر دیا۔

بغیر بالوں کے سر پر خوبصورت ہیئر اسٹائل

میں نے ایک تصویر اپلوڈ کی، ایک انکل جن کے سر پر بال نہیں تھے۔ سوچا کہ ذرا دیکھتے ہیں اے آئی  کتنا ذہین ہے۔ بس لکھا: “Get me a nice hairstyle on this”اور پلک جھپکتے ہی تصویر میں بال آگئے، وہ بھی سلیقے سے سیٹ کیے ہوئے۔ وہ منظر واقعی چونکا دینے والا تھا!

مٹی سے ہائی وے تک: ایک سفر لمحوں میں

ایک تصویر میں ایک بس مٹی کے راستے پر جا رہی تھی۔ میں نے سوچا کہ کیوں نہ اے آئی  کو کہا جائے:”Create a highway for this bus” اور یقین مانیے، چند سیکنڈز میں وہ بس ایک صاف ستھرے ہائی وے پر کھڑی تھی۔ کوئی گرد نہیں، کوئی دھول نہیں۔ ایسے لگا جیسے وہ بس کسی اشتہار کی شوٹنگ میں ہو۔

پس منظر میں “Urdu AI” کا اضافہ

ایک اور تجربہ کیا۔ تصویر میں صرف اتنا کہا: “Put background text: Urdu AI” اور پس منظر میں خوبصورتی سے ’Urdu AI‘ لکھا ہوا نمودار ہو گیا۔ وہ بھی اس انداز میں، جیسے تصویر کا حصہ ہو۔

موبائل کا رنگ بدلو، صرف ایک جملے سے

ایک خاتون کی تصویر تھی، جن کے ہاتھ میں موبائل تھا۔ میں نے کہا: “Change mobile color to yellow” اور صرف 11 سیکنڈ کے اندر موبائل کا رنگ زرد ہو چکا تھا۔ نہ کوئی ایپ، نہ کوئی برش، نہ کوئی ماسکنگ صرف ایک لائن کی ہدایت، اور کام مکمل۔

دلہن کے پیچھے سے لوگ غائب!

ایک تصویر میں دلہن کے پیچھے کچھ لوگ نظر آ رہے تھے، جو منظر خراب کر رہے تھے۔ میں نے اے آئی  کو کہا: “Remove people from background” تھوڑا وقت لیا، لیکن نتیجہ ایسا نکلا کہ جیسے تصویر کسی پروفیشنل فوٹو شوٹ سے آئی ہو۔ پیچھے سے سب غیر ضروری لوگ غائب، اور فوکس صرف دلہن پر۔

لباس کا رنگ بدلنا؟ اب بچوں کا کھیل ہے

ایک ماڈل کی تصویر اپلوڈ کی، اور صرف اتنا لکھا: “Change dress to dark blue” اور اس کے لباس کا رنگ فوراً بدل گیا۔ نہ کوئی سلیکشن، نہ کوئی کلر کوریکشن، نہ کوئی پری سیٹنگ — بس ایک جملہ، اور تصویر میں جادو!

اپنی تصویر، اپنی شرٹ، اپنا رنگ

آخر میں میں نے اپنی تصویر اپلوڈ کی۔ میں نے Urdu AI کی شرٹ پہن رکھی تھی۔ بس لکھا: “Change shirt color to dark blue” اور اے آئی  نے شرٹ کا رنگ بالکل تبدیل کر دیا۔ بغیر کسی ایڈیٹنگ ٹول کے، بغیر کسی محنت کے۔

اے آئی واقعی تیز ترین گرافک ڈیزائنر ہے

دوستو، یہ صرف چند مثالیں ہیں۔ اصل بات یہ ہے کہ google 2.0 جیسےاے آئی ماڈلز نے گرافک ڈیزائننگ کی دنیا میں انقلاب برپا کر دیا ہے۔ وہ کام، جنہیں سیکھنے کے لیے مہینوں کے کورسز کیے جاتے ہیں، اب چند سیکنڈز میں ممکن ہیں۔ نہ صرف ممکن، بلکہ بہتر، تیز تر اور زیادہ مؤثر طریقے سے۔ اگر آپ آج بھی اے آئی  سے دور ہیں، تو سوچیں آپ پیچھے کیوں رہ رہے ہیں؟ آنے والا دور اے آئی  کا ہے، اور جو اسے سیکھے گا، وہی آگے نکلے گا۔