مائیکروسافٹ 365 کوپائلٹ اب امریکی طلبہ کے لیے ایک سال کے لیے بالکل مفت

کیا آپ جانتے ہیں کہ اب امریکی کالج کے تمام طلبہ مائیکروسافٹ 365 پرسنل کوپائلٹ ایک سال کے لیے بالکل مفت استعمال کر سکیں گے؟ مائیکروسافٹ نے یہ قدم اس وقت اٹھایا ہے جب وائٹ ہاؤس نے امریکی معیشت اور تعلیمی شعبے کو مصنوعی ذہانت کی دوڑ میں آگے رکھنے کے لیے مصنوعی ذہانت ایکشن پلان کا اعلان کیا۔ اس منصوبے کا مقصد چین سمیت دیگر ممالک کے مقابلے میں امریکہ کو اے آئی کی دنیا میں سبقت دلانا ہے۔

واشنگٹن میں ہونے والی وائٹ ہاؤس کی مصنوعی ذہانت ایجوکیشن ٹاسک فورس میٹنگ کے دوران مائیکروسافٹ نے اس اقدام کا باضابطہ اعلان کیا۔ کمپنی کے صدر بریڈ اسمتھ نے تین اہم اصول بیان کیے: پہلا، تعلیمی اداروں کو اے آئی ٹولز کی فراہمی؛ دوسرا، طلبہ اور اساتذہ کے لیے اے آئی میں اپ اسکلنگ؛ اور تیسرا، اے آئی مہارت کو حقیقی روزگار کے مواقع میں تبدیل کرنا۔ اسی مقصد کو آگے بڑھاتے ہوئے مائیکروسافٹ کے سی ای او ستیہ نڈیلا نے اعلان کیا کہ کوپائلٹ کے ساتھ مائیکروسافٹ 365 پرسنل ایک سال کے لیے امریکا بھر کے کالج طلبہ کو مفت فراہم کیا جائے گا۔ ایک سال کے بعد وہ 50 فیصد رعایتی قیمت پر اس کی تجدید کر سکیں گے۔

یہ سہولت حاصل کرنے کے لیے طلبہ کو 31 اکتوبر 2025 تک اپنی درست یونیورسٹی ای میل کے ذریعے رجسٹریشن کرنا ہوگی۔ مزید برآں، کلاس رومز کو بھی Microsoft Elevate پلیٹ فارم کے ذریعے کوپائلٹ تک توسیع شدہ رسائی دی جائے گی۔ مائیکروسافٹ نے اساتذہ کی حوصلہ افزائی کے لیے 12.5 لاکھ ڈالر کے گرانٹس کا اعلان کیا ہے جو ملک بھر کے بہترین اے آئی ٹیچرز کو دیے جائیں گے تاکہ وہ طلبہ کو جدید مہارتیں سکھا سکیں۔

یہ اقدام محض ایک مفت سبسکرپشن نہیں بلکہ ایک مکمل تعلیمی اور معاشی موقع ہے۔ مائیکروسافٹ کے مطابق اس پروگرام کا مقصد طلبہ کو مصنوعی ذہانت کے عملی استعمال میں مہارت دینا ہے تاکہ وہ گریجویشن کے بعد بہتر نوکریاں حاصل کر سکیں۔ امریکا میں اس وقت تقریباً 2 کروڑ 40 لاکھ کالج طلبہ ہیں۔ اگر ان میں سے نصف بھی اس سہولت سے فائدہ اٹھاتے ہیں تو لاکھوں نوجوانوں کو جدید اے آئی مہارت حاصل کرنے کا موقع ملے گا۔ جو معیشت پر براہِ راست مثبت اثر ڈال سکتا ہے۔

تعلیمی ماہرین کے مطابق یہ اقدام طلبہ کی مہارتوں کو مضبوط بنائے گا اور انہیں مستقبل کی نوکریوں کے لیے تیار کرے گا۔ خاص طور پر ایسے وقت میں جب عالمی سطح پر اے آئی کی مہارت کی مانگ تیزی سے بڑھ رہی ہے۔ صرف امریکا میں ہی 2025 کے اختتام تک اے آئی سے متعلقہ نوکریوں میں 20 فیصد اضافہ متوقع ہے۔ اس اقدام سے امریکا میں اے آئی سے جڑی افرادی قوت کو نمایاں طور پر مضبوط کرنے کی امید ہے۔

مائیکروسافٹ کا کوپائلٹ، جو پہلے ہی کاروباری اداروں میں پیداواریت بڑھانے کے لیے جانا جاتا ہے۔ اب طلبہ کو تحقیق، اسائنمنٹس اور پروجیکٹس میں تیز اور درست مدد فراہم کرے گا۔ یہ نہ صرف وقت بچائے گا بلکہ سیکھنے کا معیار بھی بہتر بنائے گا۔ اس پروگرام سے مستفید ہونے والے طلبہ کلاس روم کے اندر اور باہر دونوں جگہوں پر جدید اے آئی کے عملی استعمال کو سیکھ سکیں گے۔

یہ قدم اس وقت بھی نہایت اہم ہے جب امریکا اپنی نوجوان نسل کو عالمی اے آئی دوڑ میں نمایاں مقام دلانے کی کوشش کر رہا ہے۔ مائیکروسافٹ اور وائٹ ہاؤس کے اس مشترکہ وژن سے یہ واضح ہوتا ہے کہ تعلیم اور ٹیکنالوجی کا ملاپ آئندہ دہائی میں ملک کی معاشی ترقی کے لیے بنیادی کردار ادا کرے گا۔