جیمینی لائیو کیمرہ موڈ: گوگل کا نیا فیچر جو اب اینڈرائیڈ اور آئی فون پر دستیاب ہے

اب کیمرہ صرف تصویریں لینے کا ذریعہ نہیں رہا، وہ دیکھتا ہے، سنتا ہے اور آپ سے بات بھی کرتا ہے۔ گوگل نے مصنوعی ذہانت کے میدان میں ایک اور قدم آگے بڑھاتے ہوئے اپنے جیمینی لائیو کیمرہ موڈ کو اینڈرائیڈ اور آئی فون صارفین کے لیے متعارف کروا دیا ہے۔

یہ وہی فیچر ہے جو پہلے صرف گوگل پکسل 9 اور سام سنگ گلیکسی S25 جیسے محدود ڈیوائسز پر دستیاب تھا۔ لیکن اب گوگل کی جانب سے اعلان کیا گیا ہے کہ یہ فیچر تمام جدید اینڈرائیڈ اور iOS صارفین کے لیے دستیاب ہوگا۔

جیمینی کیمرہ موڈ کرتا کیا ہے؟

یہ محض ایک تصویری فیچر نہیں بلکہ ایک مکمل بصری معاون (Visual Assistant) ہے۔ جیمینی کیمرہ کے ذریعے:

• اشیاء کی شناخت کرتا ہے

• ان کے بارے میں معلومات فراہم کرتا ہے

• اور آپ سے عام فہم انداز میں بات چیت کرتا ہے

یہ گوگل لینز سے بھی آگے کی چیز ہے۔ کیونکہ آپ اس سے سوال کر سکتے ہیں، اور یہ جوابات دیتا ہے۔

اینڈرائیڈ صارفین کے لیے کیا ضروری ہے؟

گوگل کے مطابق، یہ فیچر ان تمام اینڈرائیڈ فونز پر کام کرے گا جو:

• اینڈرائیڈ 10 یا اس سے اوپر ورژن پر ہوں

• کم از کم 2 جی بی ریم رکھتے ہوں

اس فیچر میں کیمرہ کے ساتھ ساتھ اسکرین شیئرنگ کی سہولت بھی دی گئی ہے۔ یعنی آپ جو کچھ اپنی اسکرین پر دیکھ رہے ہیں۔ وہ جیمینی کو دکھا سکتے ہیں، اور وہ اس کا تجزیہ کر کے آپ کو رہنمائی فراہم کرے گا۔

کیا یہ ہمیشہ درست جواب دیتا ہے؟

نہیں۔ صارفین کے مطابق، جیمینی کبھی کبھار پچھلے چیٹ سیشنز کے اثرات کی بنیاد پر اشیاء کی شناخت میں غلطی کر بیٹھتا ہے۔ مثلاً اگر آپ نے پہلے ’سائلنٹ ہل‘ ویڈیو گیم کا حوالہ دیا ہو۔ تو اگلی بار کوئی اور شے بھی اسی سے جوڑ دی جائے گی۔ لیکن کئی صارفین نے یہ بھی بتایا ہے کہ اگر پچھلی درست گفتگو سے لائیو سیشن دوبارہ شروع کیا جائے تو نتائج بہتر ہوتے ہیں۔

ایک قدم آگے: صرف اشیاء نہیں، آرٹ اور زبانیں بھی

جیمینی صرف گھریلو اشیاء کی شناخت تک محدود نہیں۔ یہ آرٹ ورک کی تاریخ، اشیاء کا جغرافیہ اور زبانوں کے ترجمے جیسے کام بھی بخوبی انجام دیتا ہے۔ گوگل نے اعلان کیا ہے کہ جلد ہی یہ فیچر گوگل میپس، کیلنڈر اور کیپ جیسی ایپس میں بھی شامل کر دیا جائے گا۔

مستقبل کی ایک اور جھلک

گوگل کے ’پروجیکٹ آسٹرا‘ کے تحت آنے والے اس فیچر کو مصنوعی ذہانت کے مستقبل کی جانب ایک اہم قدم سمجھا جا رہا ہے۔ جیمینی اب صرف ایک چیٹ بوٹ نہیں بلکہ ایک ایسا ڈیجیٹل ساتھی بن چکا ہے جو دیکھتا، سمجھتا اور بات کرتا ہے۔

 گوگل کی آفیشل اپڈیٹ: blog.google

متعلقہ لنکس:

• Gemini 2.5 Pro کا پیش نظارہ: ویب ڈیولپمنٹ میں نیا سنگ میل

• گوگل جیمینی ایپ میں آڈیو فیچر غیر فعال ہونے کی خرابی

• veo2: جیمینی اور وِسک میں ویڈیو تخلیق کا نیا طریقہ