مصنوعی ذہانت سے مفت ویب ایپ کیسے بنائیں؟

ٹیکنالوجی کی دنیا میں ایک عام تاثر یہ ہے کہ ویب ایپ یا سافٹ ویئر بنانا صرف اُنہی افراد کا کام ہے جنہیں کوڈنگ آتی ہو یا انگریزی زبان پر عبور حاصل ہو۔ تاہم مصنوعی ذہانت (AI) کی ترقی نے اس تاثر کو بدل کر رکھ دیا ہے۔ اب نہ صرف ویب ایپ بنانا آسان ہو گیا ہے، بلکہ یہ کام بغیر کسی کوڈنگ اور بغیر پیسے خرچ کیے صرف اردو میں ممکن ہو چکا ہے۔

جب صرف خیال کافی ہو: اردو میں پرومپٹ، مصنوعی ذہانت کا کمال

یوٹیوبر قیصر رونجھا کی حالیہ ویڈیو میں دکھایا گیا ہے کہ کس طرح ایک عام شخص، جسے نہ کوڈنگ آتی ہے اور نہ ہی انگریزی، صرف ایک اردو پرومپٹ کے ذریعے مکمل ویب ایپ بنا سکتا ہے۔ انہوں نے بتایا کہ اب صرف اپنا آئیڈیا بتانا کافی ہے۔ باقی اے آئی خود سمجھ کر آپ کے لیے ایک مکمل HTML، CSS اور JavaScript پر مبنی کوڈ تیار کر دیتا ہے۔

مزید پڑھیے: مصنوعی ذہانت کیا ہے؟

اردو اے آئی: چیٹ بوٹ جو سب کچھ خود کرے

قیصر رونجھا  اردو اے آئی چیٹ بوٹ کا استعمال کرتے ہیں جہاں صارف صرف یہ لکھتا ہے: “اردو اے آئی کوڈ: مجھے ایک ایسی ایپ چاہیے جو میرے سفر کے دن گن سکے” یہ سادہ جملہ چیٹ بوٹ کے لیے کافی ہوتا ہے، جو نہ صرف پرومپٹ تیار کرتا ہے بلکہ اسے کوڈنگ کی زبان میں ترجمہ کر کے دے بھی دیتا ہے۔

گوگل کا جیمینائی ماڈل: مفت کوڈنگ کی سہولت

اردو پرومپٹ حاصل کرنے کے بعد، اگلا مرحلہ ہوتا ہے Google کے Gemini 2.5 ماڈل پر جانا، جہاں یہ پرومپٹ پیش کیا جاتا ہے۔ یہ ماڈل پرومپٹ کو کوڈ میں بدل کر مکمل فائل تیار کرتا ہے، جسے آپ آسانی سے کسی براؤزر میں کھول سکتے ہیں۔ وہ بھی مکمل طور پر مفت۔

کرکٹ اسکور بورڈ: سادہ مثال، زبردست نتیجہ

ویڈیو میں ایک سادہ مگر کارآمد مثال بھی شامل ہے: ایک کرکٹ اسکور بورڈ کی ویب ایپ۔ صارف صرف اردو میں اپنا خیال بیان کرتا ہے، اے آئی اس کو ویب پیج میں ڈھال دیتا ہے جہاں ٹیم، کھلاڑی، رنز اور وکٹیں خودکار طریقے سے اپڈیٹ ہوتی ہیں۔

صرف مفت نہیں، مکمل کنٹرول بھی

قیصر رونجھا بتاتے ہیں کہ بنائی گئی ایپ کو:

• لوکل کمپیوٹر یا موبائل پر چلایا جا سکتا ہے

• HTML فائل کی صورت میں محفوظ کیا جا سکتا ہے

• اور اگر چاہیں تو ویب سائٹ پر بھی لائیو کیا جا سکتا ہے

کیا واقعی کوڈنگ کی بالکل ضرورت نہیں؟

ویڈیو بار بار یہ واضح کرتی ہے کہ استعمال ہونے والا پورا سسٹم ان لوگوں کے لیے ہے۔ جنہیں کوڈنگ نہیں آتی۔ قیصر رونجھا اعتراف کرتے ہیں کہ انہیں خود بھی کوڈنگ کا کوئی تجربہ نہیں۔ لیکن اب وہ صرف اے آئی کی مدد سے ایپ بنا لیتے ہیں۔

پرومپٹ سے پیسہ بھی کمایا جا سکتا ہے؟

ان کے مطابق صرف ایک پرومپٹ کی مدد سے بنائی گئی ایپ کو:

• گوگل ایڈسینس کے ذریعے مونیٹائز کیا جا سکتا ہے

• موبائل ایپ میں بدلا جا سکتا ہے

• پلے اسٹور پر رکھا جا سکتا ہے

• یا فروخت کر کے آمدنی حاصل کی جا سکتی ہے

 اگر آپ سوچ سکتے ہیں، تو بنا بھی سکتے ہیں

قیصر رونجھا کہتے ہیں: “مجھے خود نہیں معلوم تھا کہ میں ایسا کچھ کر سکتا ہوں، لیکن اے آئی نے ہر رکاوٹ ختم کر دی ہے۔”

یہ ویڈیو صرف تکنیکی گائیڈ نہیں۔  بلکہ ایک مثال ہے کہ اب ٹیکنالوجی ہر شخص کے لیے قابلِ رسائی ہو چکی ہے  ۔ وہ بھی اردو میں، مفت، اور بغیر کوڈنگ کے۔