سوشل میڈیا پرامپٹس کاپی کیے بغیر مصنوعی ذہانت سے تصاویر کیسے تخلیق کریں ؟

اکثر لوگ سوشل میڈیا پرامپٹس کاپی کر کے تصاویر بناتے ہیں مگر نتیجہ عام سا لگتا ہے۔ مسئلہ یہ ہے کہ برانڈ یا پیغام کے مطابق یونیک اور دلکش تصاویر نہیں ملتیں۔ اس مسئلے کا بہترین حل ہے گوگل جیمینی 2.5 فلیش ماڈل جسے نینوبنا بھی کہا جاتا ہے۔ یہ نیا ماڈل چند آسان مگر تخلیقی مراحل میں مقامی، اصل اور قابلِ استعمال تصاویر بنانے کی سہولت دیتا ہے۔ یہ ماڈل مکمل اور واضح ہدایات کے ذریعے وہ تصاویر تیار کرتا ہے جو برانڈ کی شناخت، مقامی طرز اور رنگوں کو برقرار رکھتی ہیں اور اس کا سب سے بڑا فائدہ یہ ہے کہ آپ کو پیچیدہ کیمرہ سیٹنگ یا مہنگی فوٹو شوٹنگ کی ضرورت نہیں پڑتی۔

اکثر تخلیق کار سوشل میڈیا سے پرامپٹس کاپی کر کے تصاویر بناتے ہیں جس سے نتیجہ غیر منفرد رہتا ہے۔ اس کا حل یہ ہے کہ آپ پہلے انسپائریشن لیں مگر کاپی نہ کریں۔ اس کے لیے پکسلز، پکسبے اور انسپلیش جیسی اسٹاک ویب سائٹس مددگار ہیں جو دنیا بھر کے پروفیشنل فوٹوگرافروں کی مفت اور اعلیٰ معیار کی تصاویر فراہم کرتی ہیں۔ یہ سائٹس آپ کو پوز، روشنی، زاویے اور کمپوزیشن کے حوالے سے نئے خیالات دیتی ہیں تاکہ آپ اپنی پرامپٹس میں جدت لاسکیں۔ مزید بصری رہنمائی کے لیے آپ یہ مفید تحریر دیکھ سکتے ہیں کہ اے آئی کے ذریعے تصویر تخلیق کرنے کی ورکشاپ۔ یاد رہے کہ ہر تصویر کے لائسنس قوانین پڑھنا لازمی ہے تاکہ آپ کے استعمال میں کوئی قانونی رکاوٹ نہ آئے۔

پسندیدہ تصویر منتخب کرنے کے بعد اسے جیمینی ماڈل میں اپ لوڈ کریں اور واضح لکھیں کہ پس منظر وہی رکھیں، تصویر میں موجود شخص کو پاکستانی مرد بنائیں جو شلوار قمیص میں ہو اور روشنی جوں کی توں رہے۔ چند لمحوں میں جیمینی اصل تصویر کے انداز کے ساتھ نیا ورژن بنا دے گا۔ یہ طریقہ اس وقت زیادہ موزوں ہے جب آپ صرف لباس، چہرے یا شناخت میں تبدیلی چاہتے ہیں اور باقی ماحول جوں کا توں رکھنا ضروری ہو۔ دوسرا طریقہ یہ ہے کہ جیمینی سے تصویر کا تفصیلی پرامپٹ بنوائیں۔ آپ بس تصویر اپ لوڈ کریں اور لکھیں کہ اس تصویر کا مکمل پرامپٹ تحریر کریں۔ پھر اس پرامپٹ میں اپنی ضرورت کے مطابق تبدیلی کریں جیسے مقام کراچی، لاہور یا کوئٹہ، عمر، لباس یا پس منظر۔ جیمینی اس نئے پرامپٹ کے ذریعے مکمل طور پر نئی مگر اصل تصویر تیار کرے گا۔

یہ سہولت چھوٹے کاروبار کے مالکان کے لیے نہایت قیمتی ہے۔ مثال کے طور پر اگر آپ کپڑوں کے ڈیزائنر ہیں تو صرف اپنے ڈریس کی صاف تصویر لیں۔ بہتر یہ ہے کہ پس منظر سادہ اور متضاد ہو تاکہ پروڈکٹ الگ نمایاں ہو۔ پھر جیمینی کو ہدایت دیں کہ یہی لباس ایک پاکستانی ماڈل کو پہنائیں، پس منظر لگژری ہوٹل کی لابی ہو، روشنی نرم اور قدرتی ہو، اور ڈریس بالکل اسی انداز میں دکھائیں۔ چند بار ہدایات دینے سے آپ کو اشتہاری معیار کی ماڈل تصاویر تیار مل جائیں گی، وہ بھی مہنگی فوٹو شوٹنگ کے بغیر۔

جب تصویر تیار ہو جائے تو آپ اسے فری آن لائن ایڈیٹر جیسے کینوا فوٹو ایڈیٹر میں لے جائیں، لوگو شامل کریں، سوشل میڈیا کے حساب سے سائز ایڈجسٹ کریں اور مختلف فارمیٹ میں محفوظ کریں۔

گوگل 2.5 فلیش ماڈل کے ذریعے آپ سوشل میڈیا پرامپٹس کاپی کیے بغیر مقامی، اصل اور برانڈڈ تصاویر بنا سکتے ہیں۔ انسپائریشن لینے سے لے کر تفصیلی پرامپٹ بنانے، پروڈکٹ کو ماڈل کے ساتھ دکھانے اور حتمی برانڈنگ تک ہر مرحلہ آسان اور تیز ہے۔ یہ طریقہ نہ صرف آپ کی سوشل میڈیا پوسٹس کو انوکھا بناتا ہے بلکہ اشتہارات اور کاروباری مہم کے لیے بھی براہِ راست استعمال ہو سکتا ہے۔