اردو اے آئی ماسٹر کلاس نمبر 5 میں مفت آٹومیشن سیکھیں کلاس رجسٹریشن، ای میل اور واٹس ایپ خودکار نظام

آج کی کلاس میں  مفت آٹومیشن  اور ایک ایسا خودکار نظام سیکھیں گے جو چھوٹے کاروبار، نجی اسکول اور کلینک جیسے اداروں کی کارکردگی میں نمایاں بہتری لا سکتا ہے۔ جیسا کہ ویڈیو کے آغاز میں قیصر رونجھا نے واضح کیا کہ ہم گوگل فارم کے ذریعے ڈیٹا حاصل کر کے، اسے گوگل شیٹ میں محفوظ کریں گے۔ اور پھر ای میل اور واٹس ایپ کے ذریعے اپڈیٹس خودکار طور پر بھیجیں گے۔ اگر آپ اس سیریز میں نئے ہیں تو ہماری پہلی چار کلاسیں ضرور دیکھیں تاکہ آپ کو مکمل پس منظر سمجھ آ سکے۔

کلاس کا بنیادی مقصد

جیسا کہ قیصر رونجھا نے کلاس کے آغاز میں بیان کیا، ہمارا ہدف ایک ایسا سسٹم بنانا ہے جو:

• گوگل فارم کے ذریعے ڈیٹا اکٹھا کرے
• گوگل شیٹ میں ڈیٹا محفوظ کرے
• ای میل خودکار طور پر بھیجے
• اور واٹس ایپ کے ذریعے ایک یا دو کلک میں صارف کو پیغام دے

فارم اور شیٹ کی تیاری

مفت آٹومیشن کی اس کلاس میں بتایا گیا کہ پہلا مرحلہ ایک سادہ سا گوگل فارم تیار کرنا ہے۔ جس میں شرکاء سے نام، کلاس، ای میل اور واٹس ایپ نمبر طلب کیا جائے۔ قیصر رونجھا نے یہ بھی دکھایا کہ کیسے ہر فیلڈ میں ڈیٹا کی درستگی کو یقینی بنانے کے لیے ویلیڈیشن لگائی جاتی ہے۔ جیسے واٹس ایپ نمبر صرف ہندسے قبول کرے اور ای میل ایڈریس میں ‘@’ موجود ہو۔

گوگل شیٹ میں ڈیٹا کی خودکار ترتیب

شرکاء کو دکھایا گیا کہ فارم مکمل کرنے کے بعد، اس کا ڈیٹا گوگل شیٹ میں کیسے محفوظ ہوتا ہے۔ اس کے بعد قیصر رونجھا نے دو اضافی کالم بنائے۔ ایک میسج کے لیے جہاں پیغام درج کیا جاتا ہے۔ اور دوسرا واٹس ایپ لنک کے لیے۔ اس لنک میں ایک خاص فارمولہ شامل ہوتا ہے جو پیغام، کلاس، نام اور نمبر کو ملا کر ایک کلک والا واٹس ایپ پیغام تیار کرتا ہے۔

ای میل خودکار طریقے سے بھیجنا

کلاس کے دوران یہ بھی سکھایا گیا کہ گوگل ایپ اسکرپٹ کا استعمال کیسے کیا جاتا ہے۔ تاکہ فارم کے ہر سبمیشن کے ساتھ ایک خودکار ای میل بھیجی جا سکے۔ قیصر رونجھا نے مکمل کوڈ، اس کی سیٹنگ، اور ٹرگرز کی ترتیب بھی تفصیل سے بیان کی، جس کے ذریعے ای میل فوری بھیج دی جاتی ہے۔ اور شیٹ میں اس کی رپورٹ بھی درج ہو جاتی ہے۔

واٹس ایپ لنک کا فارمولہ اور فارمیٹ

فارمولے کے تحت قیصر رونجھا نے بتایا کہ واٹس ایپ لنک میں نمبر کو خودکار طور پر ’92’ سے تبدیل کیا جائے تاکہ وہ بین الاقوامی فارمیٹ میں ہو۔ پھر گوگل شیٹ میں فارمولے کے ذریعے ہر رجسٹریشن کے لیے ایک یونیک واٹس ایپ لنک بنتا ہے۔

کلاس کا عملی استعمال

کلاس میں شرکاء کو براہ راست فارم فل کر کے دکھایا گیا کہ جیسے ہی کوئی نئی رجسٹریشن ہوتی ہے:

• ڈیٹا گوگل شیٹ میں محفوظ ہوتا ہے
• ای میل بھیجی جاتی ہے
• واٹس ایپ لنک بنتا ہے

قیصر رونجھا نے یہ بھی بتایا کہ کیسے ہم فارم کو ویب سائٹ پر ایمبیڈ کر سکتے ہیں۔ ہیڈر  امیج شامل کرسکتے ہیں۔ اور ویڈیو شامل کر کے صارف کو بہتر ہدایت دے سکتے ہیں۔

مکمل عملی طریقے

اس کلاس میں شرکاء نے مکمل عملی طریقے سے سیکھا کہ گوگل فارم، گوگل شیٹ، گوگل ایپ اسکرپٹ اور واٹس ایپ کو استعمال کر کے ایک سادہ مگر مؤثر خودکار نظام بنایا جا سکتا ہے۔ یہ نظام خاص طور پر ان لوگوں کے لیے مفید ہے جو ٹیکنالوجی کے ماہر نہیں لیکن اپنے ادارے کو منظم اور خودکار بنانا چاہتے ہیں۔

اگلی کلاس میں کیا ہوگا؟

اگلی کلاس میں قیصر رونجھا سکھائیں گے کہ اسی نظام کو ویب سائٹ میں کیسے شامل کیا جا سکتا ہے۔ HTML فارمیٹ میں کیسے ایمبیڈ کریں۔ اور ایک مکمل ڈیش بورڈ کیسے تیار کریں تاکہ روزانہ کی کارکردگی کو ایک ہی جگہ مانیٹر کیا جا سکے۔