گوگل جیمینائی کی نئی شیڈولڈ ایکشنزخصوصیت: کیسے استعمال کریں اور کیا فائدہ اٹھائیں؟

مصنوعی ذہانت کے میدان میں گوگل کی پیش رفت کا ایک اور قدم، جیمینائی کی نئی خصوصیت شیڈولڈ ایکشنز ہے جو اب پریمیم صارفین کے لیے دستیاب ہو چکی ہے۔ یہ فیچر بظاہر چھوٹا معلوم ہوتا ہے لیکن اس کی بدولت صارفین متعدد کام خودکار طریقے سے مقررہ وقت پر انجام دے سکتے ہیں۔

کیا ہے شیڈولڈ ایکشنز؟

اس خصوصیت کے تحت جیمینائی صارف کے احکامات کو طے شدہ وقت پر خود سے دہرا سکتا ہے۔ مثلاً اگر آپ کہیں: “ہر صبح میرے نئے ای میلز کا خلاصہ دو” تو جیمینائی یہ کام روزانہ خود بخود کرے گا۔

اس فیچر کو استعمال کرنے کے لیے گوگل AI Pro یا Ultra aسبسکرپشن درکار ہے اور ایک وقت میں صرف دس شیڈولڈ ایکشنز محفوظ کیے جا سکتے ہیں۔ دلچسپ بات یہ ہے کہ آپ مقام کی بنیاد پر بھی شیڈول بنا سکتے ہیں، جیسے: “ہر صبح میرے قریب ترین کافی شاپ کی تجویز دو” لیکن یہ مقام وہی ہوگا جو پہلی بار طے کیا گیا تھا، یہ خودکار طور پر اپڈیٹ نہیں ہوتا۔

کیا کچھ کیا جا سکتا ہے؟

روزانہ ای میل کا خلاصہ

بظاہر یہ عام سی بات لگتی ہے مگر اگر آپ کو روزانہ صرف ایک بار کہنا ہو کہ “میرے غیر پڑھے ای میلز کا خلاصہ دو” تو یہ وقت بچانے والا ٹول بن سکتا ہے۔ آپ اسے مزید ذاتی بنا سکتے ہیں، مثلاً صرف اہم ای میلز یا کسی مخصوص شخص کی ای میلز کو الگ کر کے پیش کرے۔

ہفتہ وار شیڈولنگ

جیمینائی سے آپ اپنے گوگل کیلنڈر کی مدد سے پوچھ سکتے ہیں: “میرے ہفتے بھر کے شیڈول اور ملاقاتوں کی تفصیل دو، اور ہر جگہ جانے کا وقت بھی شامل کرو۔” اگر آپ بتائیں کہ دن کا آغاز اور اختتام گھر سے ہو گا تو یہ تخمینہ اور بھی درست ہو جائے گا۔

آئندہ معلومات کی خودکار تلاش

اگر آپ جاننا چاہتے ہیں کہ مثلاً ‘Death Stranding 2’ کی ریلیز کے بعد کیا ریویوز آ رہے ہیں تو آپ پہلے ہی کہہ سکتے ہیں: “اگلے ہفتے مجھے پسندیدہ ویب سائٹس سے ریویوز کا خلاصہ دو”

مستقبل کی جھلک

گوگل نے IO ایونٹ میں ‘Agent Mode’ کی ایک جھلک بھی دی جس میں جیمینائی خود سے نئے اپارٹمنٹس کی تلاش کر کے رپورٹ بھیج رہا تھا۔ اگرچہ یہ فیچر ابھی دستیاب نہیں، لیکن اس سے اندازہ ہوتا ہے کہ شیڈولڈ ایکشنز وقت کے ساتھ کتنی ترقی کر سکتے ہیں۔

احتیاط اور تجاویز

• یہ فیچر صرف پریمیم صارفین کے لیے دستیاب ہے
• فی الحال ایک وقت میں صرف 10 ایکشنز رکھے جا سکتے ہیں
• ہدایات واضح اور مخصوص دیں تاکہ جیمینائی انہیں بہتر طریقے سے انجام دے سکے

جیمینائی کی شیڈولڈ ایکشنز خصوصیت ان صارفین کے لیے خاصی کارآمد ہے جو بار بار دہرائے جانے والے کاموں سے بچنا چاہتے ہیں۔ یہ نہ صرف وقت بچاتی ہے بلکہ ایک بار ہدایت دینے کے بعد خودکار طور پر کام انجام دیتی ہے۔ یوں یہ فیچر آپ کی روزمرہ زندگی میں ایک خاموش مگر قابلِ اعتماد معاون ثابت ہو سکتا ہے۔

یہ بلاگ Lifehacker پر شائع شدہ مضمون پر مبنی ہے، جسے آپ یہاں مکمل طور پر پڑھ سکتے ہیں۔