اے آئی کی مدد سے مفت ویب سائٹ کیسے بنائیں؟ پاٹ 2

اگر آپ خود اپنی پروفیشنل ویب سائٹ بنانا چاہتے ہیں، بغیر کوڈنگ سیکھے، اور بالکل مفت، تو بلاگر اور مصنوعی ذہانت  کی مدد سے یہ کام اب انتہائی آسان ہو گیا ہے۔ اس بلاگ میں ہم آپ کو مکمل طریقہ بتائیں گے کہ کیسے آپ مصنوعی ذہانت کے استعمال سے ایک مکمل، دلکش، اور فعال ویب سائٹ تیار کر سکتے ہیں۔ اس بلاگ کا تعلق “اردو اے آئی ماسٹر کلاس” سیریز کے دوسرے حصے سے ہے۔ جس میں قیصر نے تفصیل سے ویب سائٹ ڈویلپمنٹ کے اہم نکات بیان کیے ہیں۔ پہلے حصے میں ڈومین خریدنے اور بلاگر کے ساتھ جوڑنے کا طریقہ بتایا گیا، اور اب اس حصے میں ویب سائٹ کو تھیم، کوڈنگ، اور کسٹمائزیشن کے ذریعے مکمل شکل دی جا رہی ہے۔

 تھیم ایک ویب سائٹ کی جان ہوتی ہے۔ جتنا تھیم بہتر ہوگا، ویب سائٹ اتنی پروفیشنل لگے گی۔ اگرچہ بلاگر کچھ محدود فیچرز دیتا ہے، لیکن مصنوعی ذہانت کی مدد سے آپ اپنی ضرورت کے مطابق مکمل HTML کوڈ تیار کروا سکتے ہیں۔ بس آپ کو پرامپٹ میں واضح طور پر لکھنا ہوگا کہ یہ بلاگر ویب سائٹ ہے، کس مقصد کے لیے ہے (تعلیمی، بزنس، غیر منافع بخش)، کتنے پیجز ہوں گے، اور کس قسم کا لے آؤٹ درکار ہے۔
مثلاً اگر آپ کہتے ہیں: “Write an HTML theme code for a Blogger website with Home, About, Contact pages focused on online education.” تو مصنوعی ذہانت جیسے چیٹ جی پی ٹی یا جمینی مکمل کوڈ فراہم کر دے گا۔ آپ یہ کوڈ بلاگر میں جا کر ‘ایڈٹ HTML’ میں پیسٹ کر کے اپنی ویب سائٹ کو مکمل طور پر اپنی مرضی کے مطابق بنا سکتے ہیں۔

اگر کوڈ میں کوئی مسئلہ آ جائے، تو وہ بھی مصنوعی ذہانت کے ٹولز جیسے Gemini، Zed AI یا Grok کی مدد سے آسانی سے حل ہو سکتا ہے۔ اس کا طریقہ یہ ہے کہ اس مسئلہ کا اسکرین شاٹ لے کر مصنوعی ذہانت کو دکھائیں اور کہیں کہ “Fix this code for Blogger.” تھیم اپلائی کرنے کے بعد، اگلا مرحلہ ہوتا ہے پوسٹس اور پیجز بنانا۔ پوسٹس وہ ہوتے ہیں جو آپ بلاگ کے طور پر اپلوڈ کرتے ہیں۔ جیسے “Top 5 English Learning YouTube Channels” وغیرہ۔ پیجز وہ مستقل صفحات ہوتے ہیں جو ویب سائٹ کے مینو میں ہوتے ہیں جیسے “About Me” یا “Contact Us”۔ ہر پوسٹ یا پیج کے لیے آپ مصنوعی ذہانت سے HTML کوڈ لکھوا سکتے ہیں۔ جیسے اگر آپ چاہتے ہیں کہ “Write a welcome message for an educational website in HTML”, تو مصنوعی ذہانت کو یہ پرامپٹ دیں اور اس کا کوڈ پیسٹ کر دیں۔ اس کے بعد آپ اس میں تصویر، لنکس، اور ویڈیوز بھی شامل کر سکتے ہیں۔

تصاویر شامل کرنے کے لیے، آپ کوئی بھی پوسٹ بنائیں، اس میں تصویر اپلوڈ کریں، اور “Copy image address” کر کے اسے دوسرے پیج میں استعمال کریں۔ اس طریقے سے آپ About page میں اپنی تصویر بھی ڈال سکتے ہیں۔ تھیم میں مزید بہتری کے لیے، آپ مصنوعی ذہانت کو بتا سکتے ہیں کہ فلاں سیکشن میں تبدیلی کریں یا نیا فیچر شامل کریں۔ مثلاً “Add WhatsApp link in footer” یا “Embed YouTube channel in header” اور مصنوعی ذہانت آپ کو کوڈ فراہم کرے گا۔

ویب سائٹ مکمل ہونے کے بعد، آپ اسے مختلف کلائنٹس کو بیچ سکتے ہیں۔ جیسے اگر آپ نے کسی تعلیمی ادارے یا سروس فراہم کرنے والے کے لیے ویب سائٹ بنائی، تو 2000 روپے کی لاگت سے بننے والی ویب سائٹ کے بدلے آپ 10000 سے 40000 روپے تک کما سکتے ہیں۔ یہ پورا عمل بہت آسان اور عملی ہے۔ خاص طور پر ان نوجوانوں کے لیے جو بغیر پروگرامنگ سیکھے ویب ڈویلپمنٹ سے آمدن حاصل کرنا چاہتے ہیں۔

قیصر کے مطابق، اگلی ویڈیو خالدمیر صاحب کی ہو گی جو بتائیں گے کہ ان ویب سائٹس کو کیسے مارکیٹ کیا جائے اور کس طرح لوگوں کو اپنی خدمات بیچی جائیں۔ Cloudflare سے ڈومین خریدیں (تقریباً 2100 روپے میں)، بلاگر سے اکاؤنٹ جوڑیں، مصنوعی ذہانت ٹولز سے تھیم اور HTML کوڈ حاصل کریں، پیجز اور پوسٹس بنائیں ( مصنوعی ذہانت کی مدد سے)، اپنی تصویر، سوشل لنکس اور ویڈیوز ایمبیڈ کریں، ایرر آنے پر مصنوعی ذہانت سے مدد لیں، ویب سائٹ کو کلائنٹس کے لیے بنائیں اور پیسے کمائیں۔